மை நேம் இஸ் பில்லா!!

வினோத விலாசங்கள்.

நண்பர்களே,

மனிதனாய் பிறந்த நம் ஒவ்வொருவரையும் அடையாள படுத்துவதற்கென்று அங்க அடையாளங்கள், மச்சங்கள்,தழும்புகள் , கண்களின்  நிறம், உருவ அமைப்பு போன்று  பல்வேறு  விடயங்கள்  உள்ளன.    அவற்றுள் பிரதானமாகவும் முக்கியமானதாகவும் கருதப்படுவது அவரவர்களின் பெயர்களே.

நம் வீட்டிலும் சில வன விலங்கு சரணாலயங்களிலும்,விலங்கியல் பூங்காக்களிலும் வைத்து பராமரிக்கப்படும் விலங்குகளுக்கே பெயர்வைத்திருக்கும்போது மனிதர்களுக்கு இந்த பெயர்கள் மிகவும் இன்றியமையாததாக ஆகின்றது,.

 பிறக்கபோவது ஆணா  இல்லை பெண்ணா  என்பது  பிறக்கப்போகும் குழந்தையின் முடிவல்ல அதுபோல தனக்கு என்ன பெயர் வைக்கப்பட வேண்டும் என்பது அந்த குழந்தையின் முடிவோ விருப்பமோ அல்ல.

 

பெற்றோர் தங்களின் குழந்தைகளுக்கு, தங்களின் பெற்றோர், மூதாதையர், தங்களின் குல தெய்வங்கள், தங்களின் விருப்ப கடவுள்கள், தேச தலைவர்கள்,கட்சி தலைவர்கள் போன்றோரின் பெயர்களையும் சூட்டி மகிழ்வர்.

இன்னும் சிலர், தமக்கு பிரசவம் பார்த்த மருத்துவரின் பெயரைக்கூட வைத்ததாக கேள்வி படுகிறோம். இன்னும் சிலர் ஜாதக , ஜோஷிய,எண்  கணித அடிப்படையிலும், நீண்ட நாட்களாக பிள்ளை இல்லாமல் பெற்றேடுத்த குழந்தை என்பதால் எந்த தெய்வ வழிபாட்டால் இந்த குழந்தை  பிறந்தது என்ற நம்பிக்கையில் அந்த தெய்வத்தின் கோவில் அமைந்திருக்கும் ஊரின் பெயரைக்கூட வைப்பது சகஜமே. அதேபோல, இலக்கிய,இதிகாச, புராண,மத மறை நூல்களின் அடிப்படையிலும் பெயர்கள் சூட்டப்படுவது உண்டு.

இப்படி பெற்றோரின் விருப்பப்படி வைக்கப்பட்ட பெயர்களை சுமந்துகொள்ளும் குழந்தைகள், நாளடைவில் வளர்ந்து பெரியவரான பிறகு, பெயர்களிலுள்ள  பல சங்கடங்களை உணர்ந்து தங்கள் பெயர்களை மாற்றி அமைத்துக்கொள்வதும் அங்கங்கே நிகழ்வதுவும் உண்டு.

நம் நாடு மட்டுமல்லாது அயல் நாடுகளிலும் தங்களின் பெயருடன் தங்கள் குடும்ப பெயரையும் சேர்த்துக்கொள்வது என்பது நடைமுறையில் உள்ள ஒரு வழக்கமே. இதில் சாதி பெயர்களை சேர்த்துவைத்துக்கொள்வதும் அடங்கும்.

பெரும்பாலும் நம் நாட்டின் எல்லா பகுதிகளிலும் இதுபோன்ற குடும்பப்பெயர்கள் வைப்பது வழக்கம் இல்லை , ஆனால் ஐரோப்பா போன்ற மேலை நாடுகளில் இந்த குடும்ப பெயர் அல்லது குழும பெயரை(SURNAME ) தங்கள் பெயருடன் சேர்த்துக்கொள்வது இன்றியமையாதது.  

குறிப்பாக ஆண்  பிள்ளைகள் தாம்  வளர்ந்த பின்னர் பெற்றோர் இட்ட தங்களின் பெயர் தமக்கு பிடிக்கவில்லை, அல்லது சொல்வதற்கு சங்கோஜமாக இருக்கின்றது, உச்சரிக்கும்போது பலர் கேலி செகின்றனர், அது நாகரீகமாக இல்லை , ஸ்டயிலாக   இல்லை போன்ற காரணங்களுக்காக மாற்றிக்கொண்டாலும் அவர்களது குடும்ப பெயரை கண்டிப்பாக மாற்ற முடியாது. பெண்கள் தங்களின் திருமணத்திற்குப்பின்னர் தனது கணவரின் குடும்ப பெயருக்கு  மாற்றிக்கொள்வது சகஜம்.

நம்ம ஊரில் நமது பிராந்தியத்தில் அப்பாவின் பெயரை நமது பெயருக்கு பின்னால் சேர்த்துக்கொள்வதும் திருமணத்திற்கு பிறகு மனைவிகள் தங்கள் கணவரின் பெயரை தங்கள் பெயருக்கு பின்னால் சேர்த்துக்கொள்வதும் நடைமுறை;ஆனால் இங்கே சில பெண்கள் திருமணத்திற்கு பிறகும்  தங்களின் இயற்பெயர் மற்றும் குடும்ப பெயர்களை  அப்படியே வைத்துக்கொண்டாலும் , பெரும்பான்மையானவர்கள் தங்கள் கணவரின் குடும்ப பெயருக்கு மாறிவிடுவதுதான் நடை முறை.

 குடும்ப பெயர் எப்படி இருந்தாலும் அதைத்தான் இவர்கள் வைத்துக்கொள்ளவேண்டும் தங்களின் பெற்றோர் வைத்த பெயர்களை மாற்றிக்கொள்வதுபோல இந்த குடும்ப பெயர்களை மாற்றிக்கொள்ளும் அதிகாரம் / உரிமை ஆணுக்கோ  அல்லது  திருமணமானபின் கணவரின் குடும்ப பெயரை  சேர்த்துக்கொள்ளும் பெண்ணுக்கோ கிடையாது.

இந்த குடும்ப பெயர்கள் பல நேரங்களில் நமக்கு நகைப்பை கொடுத்தாலும் அவர்களுக்கே சங்கோஜ நிலையை உண்டுபண்ணினாலும் வேறு வழி இல்லை. பச்சை குத்தினாலும் அதை அழித்துவிட்டு வேறு குத்திக்கொள்ளலாம் ஆனால் இந்த குடும்ப பெயர் என்பது மண்ணுக்குள் மறைந்தாலும் விண்ணுக்குள் விரைந்தாலும் மாறவே மாறாது.

ஆணாக இருந்தால் அவர்களின் முதற் பெயரை நேரடியாகவே அழைக்கலாம், அவரது குடும்ப பெயரை மட்டும் அழைப்பதாக இருந்தால் மிஸ்டர்,  என்று சொல்லி அந்த குடும்ப பெயர்களை சொல்லவேண்டும், பெண்களை மிஸர்ஸ்  அல்லது மிஸ் என்று சொல்லித்தான் அழைக்கவேண்டும்.

இதில் என்ன சங்கோஜம் இருக்கமுடியும்? பெயர்கள் பெயர்கள்தானே ?

சில பெயர்களை பலர் முன்னிலையில் சொல்ல நேரும்போது முதன் முதலில் அதை கேட்க நேருபவர்கள்  ஒரு வியப்பையும், ஏளன புன்  சிரிப்பையும் வெளிப்படுத்துவது இயல்பே. 

பதினோராம் வகுப்பு முடித்தபிறகு வேலை வாய்ப்பு அலுவலகத்தில் பதிவு செய்ய போனபோது, என்னை போன்ற குறைந்தது நூறு மாணவர்களை ஓரிடத்தில அமர செய்து,அலுவலர் எங்கள் ஒவ்வொருவரின் பெயரையும் சத்தமாக சொல்ல சொன்னார். 

எல்லோரும் சொல்லிக்கொண்டு வந்தோம் இடையில் பலர் சிரித்தனர், பலர் திரும்பி பார்த்தனர், சிலர் பேரை சொல்லவே சில நொடிகளை எடுத்துக்கொண்டனர் தங்கள் பேரை சொல்ல வெட்கப்பட்டு.

இதில் உச்சகட்ட வியப்பு என்னவென்றால்,ஒரு மாணவன் தன்  பெயர் "சக்கர பாணி" என்று சொன்னதும் அந்த அலுவலர், அந்த மாணவனிடம் அப்படியென்றால் உன்னை தொட்டுப்பார்த்தல் இனிக்குமா? என கேட்டார்.

அதற்கு வேறொரு மாணவன் , தொட்டுப்பார்த்தால் எப்படி சார் இனிக்கும் நீங்கள் கிட்டே வந்து நக்கி பார்க்கவேண்டும் என சொல்ல இப்போது அந்த அலுவலருக்கு தாம் அப்படி சொல்லி இருக்க கூடாது என்று தோன்றி இருக்க வேண்டும்.

நானுமிந்த நாட்டிற்கு வந்த புதிதில் பல குடும்ப பெயர்கள் கொஞ்சம் வித்தியாசமாக இருப்பதை உணர்ந்து உள்ளத்தில் புன்னகித்துள்ளேன், என் பெயரை கேட்டும் அப்படி புன்னகித்தவர்கள் இருந்திருக்கக்கூடும், இங்கே எந்த இந்திய பெயரானாலும் இவர்களின் உச்சரிப்பு கொஞ்சம் நச்சரிப்பகத்தான் இருக்கின்றது.

இங்குள்ள சில குடும்ப பெயர்கள் கொஞ்சம்  அதிர்ச்சியாகவும்,  வித்தியாசமாகவும்  சில பெயர்கள் வியப்பாகவும் இருக்கும்.

அவற்றுள் சில:

Penny,Pound ,Dollar,Spinster,Death,Bread,BirdsWhistle,Mirracle,Smellie ,Glass, White ,Brown,Green ,Grey ,Gold ,Garland,Price, Stone,Summer,Winter, Price, People , Swan ,Peacock ,Blacksmith ,Goldsmith , Wood ,Webb போன்றவை.

வியப்பில் ஆழ்த்திய அதே சமயத்தில் கொஞ்சம் சங்கோஜப்படுத்திய ஒரு பெண்ணின் sur name : Bracier.

இப்படி வினோதமான பெயர்களை  Strange பெயர்கள் என்று சொல்லலாம்.

ஆனால்  ஒரு பெண்மணியின் குடும்பத்தின்  பெயரே "Strange " என்று சில நாட்களுக்கு முன் அறிந்தபோது இப்படியும் ஒரு கும்ப பெயரா என எனது வியப்பை மேலோங்க செய்தது.

நண்பர்களே, இந்த பதிவு யார் மனதையும் புண் படுத்த அல்ல என்பதை முழு மனதுடன் பிரகடனப்படுத்தி இப்பதிவை நிறைவு செய்கிறேன்.,

நன்றி,

மீண்டும் ச(சி)ந்திப்போம் 

கோ