கடல் பயணம்!!

ரயிலேறி.....

நண்பர்களே,

பயணங்கள் என்று சொல்லும்போது, அதற்காக நாம் பயன்படுத்தும் வாகனங்கள் பலவகைப்படும். 

வாகனமே இல்லாமலும்  பயணப்படலாம்  கால் நடையாக.

வாகனங்களில் , இருசக்கர வாகனம்,மாட்டு வண்டி, குதிரைவண்டி, மகிழுந்து, பேருந்து, டிராக்டர், தொடரி  எனப்படும் ரயில் வண்டி, வான ஊர்தி , தோணி, படகு, கப்பல் போன்ற வாகனங்கள் நம் நினைவிற்கு வரும்.

இவற்றிற்கான பயணப் பாதைகளும் அந்தந்த வாகனங்களின் தன்மைக்கு ஏற்ப, நிலம் நீர் ஆகாயம் எனும் வரையறைகளுக்குள்  ஏதேனும் ஒன்றில்தான் அமையும் என்பதும் நாம் அறிந்ததே.

அவ்வகையில் , தரையில் ஓடும் வாகனங்கள் மூலம் தரையிலும்  ஆகாயத்தில் ஓடும் வாகனங்கள் மூலம் ஆகாயத்திலும் , நீரில் ஓடும் வாகனங்கள் மூலம் நீரில் மட்டுமே பயணிக்க முடியும் என்பதும்  நடைமுறை சாத்தியங்கள்.

அப்படி சாலை மார்க்கமாகவும் கடல் மார்க்கமாகவும் ரயில் மார்க்கமாகவும் விமானம் மார்க்கமாகவும் பல பயணங்கள் மேற்கொண்டிருந்திருந்தாலும் இந்த  பதிவில் குறிப்பிடப்போகும் கடற்  பயணம்  முற்றிலும் மாறுபட்ட ஒரு பயணமாக அமைந்திருந்தது.

எமது முந்தைய பதிவுகளான,காதல் தேசத்தில் மற்றும் பொக்கிஷ பேரழகே போன்ற பதிவுகளில் குறிப்பிட்டிருந்ததுபோல் அந்த பிரஞ்சு பயணம் எனக்கு பலவகைகளில் சிறப்பான பயணமாக அமைந்திருந்தது, அதில் இரண்டு உங்களுக்கு தெரியும் இது அடுத்தது.

எனக்கு நினைவு தெரிந்து முதன்முதலாக பத்தாம் வகுப்பு படிக்கும் போது  மேற் கொண்ட  முதல் படகு பயணம்  கன்னியா குமரி  கரையிலிருந்து விவேகானந்தர் பாறை வரை சென்று வந்தது.

பின்னர் கேரளாவில் எர்ணாகுளதிலிருந்து கொச்சி வரை என நினைக்கின்றேன்.

அதை தொடர்ந்து, ஒக்கேனக்கல் பரிசல் பயணம்,கொடைக்கானல், கோவா,பாண்டிச்சேரி ,   போன்ற  உள்  நாட்டிலும் , இங்கிலாந்து, ஸ்காட்லாந்த்து, ஸ்விட்சர்லாந்து, அமேரிக்கா, எகிப்த்து, சிங்கப்பூர் , துருக்கி, ஜார்ஜியா போன்ற வெளி நாடுகளிலும் ஏரிகள் , கடல்கள் போன்றவற்றின் மீது பயணித்திருந்தாலும் இந்த பதிவில் வரும் கடற் பயணம்  இவை எல்லாவற்றிலுமிருந்து முற்றிலும் மாறுபட்டதாக அமைந்ததற்கு காரணம்.....

மேற்சொன்ன அனைத்து பயணங்களும் அந்ததந்த ஊர்களின் நீர் பரப்பிற்குள்ளாகவே நடைபெற்றவை. ஆனால் இந்த பயணம் ஒரு நாடு விட்டு வேறு  நாட்டிற்கு செல்லும்படியான கடற்பயணம் என்பது மட்டுமல்ல.... அதையும் தாண்டி....

இந்த பயணம் கடல் பயணமானாலும் அதற்கான வாகனம், படகோ , ferri யோ , கப்பலோ அல்ல.

மாறாக ரயில்.. ஆம்.  இங்கிலாந்து மற்றும் பிரான்ஸ் தேசங்களை இணைக்கும் கடல் மார்க்கமான- அதாவது கடலுக்கடியிலுள்ள மார்க்கமாக   Euro Star  எனும் தனியார் நிறுவனம் மற்றும் UK அரசு இணைந்து நடத்தும் ஆழ்கடல் சுரங்கப்பாதை ரயில் சேவை  அது.

உலகின் நீளமான ஆழ்கடல் சுரங்கப்பாதை  ரயில் பயணம் இது. 

சுமார் 31.5 மைல்களுக்கு ஆங்கில கால்வாய் என அழைக்கப்படும் கடல் மட்டத்திலிருந்து சுமார்  246 அடி ஆழத்தில் அமைக்கப்பட்டிருக்கும் இந்த ரயில் பாதையில் இங்கிலாந்தில் இருந்து பிரான்ஸ் சென்றடைய சுமார்இரண்டு மணி 16 நிமிடங்கள் ஆகின்றது.

இந்த ஆழ்கடல் சுரங்கபாதையின் நீளத்தை அறிந்துகொள்ள 169 ஈபிள் கோபுரங்களை ஒன்றன் மேல் ஒன்றாக நீள வடிவில்  படுக்க வைத்தாற்போல்  அடுக்கினால் எவ்வளவு நீளம் வருமோ அத்தனை நீளம் என்றறியப்படுகிறது.

இதில் ஆட்கள் மட்டுமின்றி சிறிய ரக வாகனங்களும் ஏற்றி செல்லப்படுகின்றன.

இப்படியாக வருடம் முழுவதும் சுமார் 350 ரயில்கள் இயங்குவதாக அறிந்தபோது  தைரியமாகவும் வியப்பாக இருந்தது. அதேசமயத்தில்  சில நேரங்களில் ஆழ்கடல் ரயில் பயணத்தின்போது ரயில்  பழுதாவதும்(பிரேக்டௌன்) உண்டென்று அறிந்தபோது கொஞ்சம் அச்ச மாகவும்  திகிலாகவும் இருந்தது என்பதை சொல்லவும் வேண்டுமோ? அதே ரயிலில் மீண்டும் திரும்பி வரும்போதும் கலகலப்பான அதே சமயத்தில் கலவையான உணர்வுடன் பயணித்த அனுபவம் மறக்க இயலாது.

இப்படி வாழ்வில் முதன்முறையாக கடலடியில் ஒரு ரயில் பயணத்தை செய்தது இந்த முறை  எமது பிரான்ஸ் பயணத்தின் மற்றுமொரு கூடுதல் சிறப்பு.

நன்றி,

மீண்டும் ச(சி)ந்திப்போம் 

கோ.