அது வேற! இது வேர்ர்ர்ற!!

Brilliant!!

நண்பர்களே,

கலிகாலம் என்றழைக்கப்படும் இந்த அதிநவீன யுகத்தில் நாட்டில் உலவும் புதிய வார்த்தைகளின் வரவு எங்குபோய் முடியுமோ என்று அச்சத்துடன் எதிர் கொள்ளவேண்டி இருக்கின்றது.

மதிப்பிற்குரிய நம் ஐயா முனைவர்.ஜம்புலிங்கம் அவர்களோ, அல்லது மூத்தபதிவர்கள் திரு. துளசிதரன், திருமதி கீதா , மற்றும் எழுத்துலகில் பல தலைமுறையினரின் வரலாற்றை எடுத்தியம்பும் கரந்தை திரு ஜெயக்குமார் போன்றோரும் தங்கள் பள்ளி கல்லூரி நாட்களில் இது போன்ற வார்த்தைகளை கேட்டிருப்பார்களா என்பது சந்தேகத்திற்கிடமின்றி சந்தேகமே.

இந்த வரிசையில் எத்தனையோ சொற்களும் சொற்றொடர்களும்

இருந்தாலும் , இன்றைக்கு இப்பதிவின் பார்வை ஒரு குறிப்பிட்ட சொற்றொடரின்பால் கவர்ந்திழுக்கப்படுகிறது.

நம்ம ஊரில் பயன்படுத்தப்படும் இந்த ஆங்கிலமும் தமிழும் கலந்த வார்த்தை கோர்வை  நம்ம ஊரில் எந்த கருத்தை  பிரதி பலிக்கின்றதோ அதே கருத்திற்காக இங்கேயும் ஆங்கிலேயர்களால் பயன்படுத்தப்படுகிறது என்பது கூடுதல் ஆச்சரியம்.

ஒரு செயலோ , பொருளோ  அல்லது உணவோ நன்றாக இருப்பதை பாராட்டி   ஆங்கிலேயர்கள்  very good , great ,amazing ,fantastic , unbelievable, incredible, extraordinary, remarkable, outstanding, Exceptional ,Excellent ,Marvellous Superb , First rate , First-class , wonderful , splendid, nailed , போன்ற உயர்வு நவிற்சி வார்த்தைகளை  சொல்வதுண்டு.

இதில் brilliant என்ற வார்த்தையை சர்வ சாதாரணமாக பயன்படுத்துவது தெரியாமல், வந்த புதிதில் நான் செய்த வேலையை மேலாளர் பார்த்து,   மற்ற எல்லா(ஆங்கிலேய) ஊழியர்களின் மத்தியில்  என்னை  "brilliant" என்று சொன்னதை பாராட்டாக நினைத்து, கல்லூரியில் Best Student award வாங்கிய நாள் அன்று பெற்ற அதே மகிழ்ச்சியுடனும்   ஆனந்த கண்ணீரோடும் கடல் கடந்துவந்தும் நம் இந்திய திருநாட்டிற்கு புகழ் சேர்த்துவிட்டோம் என     பெருமைபட்டுக்கொண்டேன்.

பிறகு போகப்போக  இது ஒரு சம்பிரதாய வார்த்தையென்றும் இதற்கும் நாம் நினைக்கும் பொருளுக்கும் ஏதொரு சம்பந்தமும் இல்லை எனவும் இவர்கள் எதற்கெடுத்தாலும் இந்த வார்த்தையை  அனிச்சையாக சொல்கிறார்கள் என்பதையும் புரிந்துகொண்டேன் என்பது வேறு விஷயம்.

 

இப்படி உயர்வு நவிற்சிக்காக நம்ம ஊரில்,நல்லது,பாராட்டத்தக்கது,சிறப்பு… சிறந்தது, உயர்வு, இனிமை ,மேன்மை  போன்ற  சொற்களை பயன்படுத்துவார்கள். 

இப்படியாக இருந்த தமிழ் வார்த்தைகள் நாளடைவில்  மறைந்து, பாராட்டு வார்த்தைகளாக, " பின்னிட்டீங்க", "கொன்னுட்டீங்க", "கலக்கிட்டீங்க",மெர்சல்  என்பன வழக்கத்திற்கு வந்து புழங்க ஆரம்பித்து இப்போது ஆங்கிலமும் தமிழும் கலந்த புதியதொரு சொற்றொடர், நம் தமிழக  அவனியிலே பவனிவர  ஆரம்பித்திருக்கிறது.

கடந்த வாரம் இங்கே,(இங்கிலாந்தில்)தொலைக்காட்சி நிகழ்ச்சியில் ஒரு ஆங்கில பெண் சில வீட்டு உபயோக பொருட்களை அறிமுகம் செய்து வைக்கும்போது பயன்படுத்திய வார்த்தைகளை கேட்டு , இது அப்படியே நம்ம ஊருக்கு சொந்தமானதாக இருக்கின்றதே என நினைத்து அதிர்ந்தேன். இப்போ இங்கேயும் வந்துவிட்டதா? அல்லது இங்கிருந்து அங்கே சென்றதா?

சரி அந்த பெண் சொன்ன வார்த்தை என்ன? அது எப்படி நம்ம ஊரிலும் சொல்லப்படுகிறது?

இந்த பெண்ணாவது சாதாரணமாக எந்த மேலெழுத்தமும் இன்றி நுனி நாக்கில் சிரமமின்றி உச்சரித்த அந்த வார்த்தையினை நம்ம ஊர் மக்கள், ஆங்கிலமும் தமிழும் கலந்து நம்ம ஊர்   பாணியில் அதற்கொரு அழுத்தம் கொடுத்து , நாக்கின் நுனி தேயும்படி  உச்சரிக்கும் போது , அது வேர்ர்ர்ர்ற…..லெவல் .

சரி பதிவு முழுவதும் ஏதோ புதிய வார்த்தை நம்ம ஊரில் உலவுவதாக சொன்னீர்களே  அது என்ன வார்த்தைகள்  இன்னும் சொல்ல்ல்ல்... லவே இல்லையே?

அதான் சொன்னேனே,  "அது வேர்ர்ர்ர்ற…..லெவல்" என்று. 

அப்போ  அந்த பெண் சொன்ன ஆங்கில வார்த்தைகள் ?

அந்த பெண் ஒரு மினி பீட்ஸா எந்திரத்தின் சிறப்பை சொல்லும்போது , இதில் செய்யப்படும் பீட்ஸாவின் ருசி, " Different  Level" என்றார், இதன் அர்த்தமும் நம்ம ஊர் வார்த்தைகளின் அர்த்தமும் 100% ஒன்றாக இருந்தாலும் நாம சொல்லும்போது அது வேற லெவெல்தான்.

ஒருபதிவையேனும் வேற லெவலில் எழுத வேண்டும் என்று நினைத்திருந்தவனுக்கு  இந்த  வேர்ர்ர்ர்ற…..லெவல் கைகொடுத்தது, brilliant !!!!??

நன்றி,

மீண்டும் ச(சி)ந்திப்போம்

கோ.