கண்மணிபோல்

நன்றி - நம்பிக்கை

நண்பர்களே,

புத்தாண்டின் முதல்நாள் காலையில் ,நம்மில் பெரும்பான்மையானோர், நல்ல செய்திகள் கேட்பது  அல்லது நல்ல விஷயங்கள்அறிவது , மங்களகரமான சூழல் நமை சூழ்ந்திருக்க விரும்புவது
, நல்லோர் முக தரிசனம் செய்வது  , நல்லோர் மொழி அல்லது நேசத்திற்குரியவரின் குரல் கேட்பது , பெற்றோர் பெரியோர்களை வணங்குவது,தெய்வ வழிபாட்டில் ஈடுபடுவது , அல்லது நல்ல கருத்துமிக்க பாடல்களை கேட்பது இப்படி எல்லாமே நன்மையான - நேர்மறையான விஷயத்துடன் புத்தாண்டை துவக்கவே விரும்புவோம்.

நானும் காலையில் எழுந்து,கண்களை மூடிக்கொண்டு  மானசீகமாக இறைவனுக்கு, இந்த புதிய ஆண்டை மீண்டும் ஒருமுறை என் வாழ்வில் காண கிருபை புரிந்ததற்கு நன்றி தெரிவித்தேன்.

நன்றி தெரிவித்ததோடு, கடந்த ஆண்டு முழுதும் என் வாழ்வின் எல்லா ஏற்ற இறக்கங்களின் போதும், சுக துக்கங்கள் நேர்ந்தபோதும், பயணங்களின்போதும்,பணியின்போதும்,சுகவீனமாயிருந்த நேரங்களிலும்,மன  கஷ்டங்களின் போதும் சோர்வுற்ற வேளைகளிலும் என்னோடு இருந்து இந்த எல்லா சூழ்நிலைகளிலும் நான் சிக்கி மூழ்கி நிர்மூலமாகதபடி என் கரம் பிடித்து, துன்பங்களையும் வேதனைகளையும் சுகவீனத்தையும் தாங்கிக்கொள்ள - அவைகளை மேற்கொள்ள  சக்தியையும் மன உறுதியையும் கொடுத்து என்னை எல்லா இக்கட்டுகளில் இருந்தும் , இன்னல்களில் இருந்தும்,  விலக்கி கண்மணிபோல் காத்து வழி நடத்தியமைக்கு நன்றியையும் தெரிவித்தேன். 

ஏற்ற நேரத்தில் எனக்கு தேவையான எல்லா உதவியையும்  அளித்த  அந்த பரம்பொருளுக்கு மனதார மீண்டும் ஒருமுறை நன்றி சொல்லிவிட்டு, 

இந்த புதிய ஆண்டிலும் உமது கரம் என்னை விலகாமல் இறுக பற்றிகொள்ளவேண்டும் என்ற வேண்டுதலையும் ,என்னுடைய உற்றார், உறவினர், இன ஜன பந்துக்கள், நண்பர்கள் மட்டுமின்றி , உலகில் வாழும் அனாதைகள், விதவைகள், வீடின்றி தவிப்போர்,வியாதியில் இருப்போர் , உணவின்றி இருப்போர் அனைவருக்கும் இந்த புதிய ஆண்டு ஒரு மகிழ்ச்சியான ஆண்டாக அமையவேண்டும்  என என் வேண்டுதலையும் வைத்துவிட்டு கண்களை திறந்தேன்.

(இறை வணக்கம் முடிந்ததும் வருட பிறப்பதுவும் காலையில் ஒரு நல்ல பாடலை  கேட்கணுமே என்று கணனியில் கண்காணா  தெய்வமே.. என்ற பாடலை கேட்கலாம் என்று தட்டச்சி செய்ய ... எனக்கு கிடைத்த பாடல்.... அதை நாளை சொல்கிறேன்.)

மனதார வேண்டும் எல்லா  வேண்டுதலையும் நிறை வேற்றுபவனே இறைவன் என்றாலும் , யார் யாருக்கு என்னென்ன , எப்போது, எவ்வளவு கொடுப்பதென்பதை அவன்தானே முடிவு செய்யவேண்டும்.

அப்படி நம்மில் எல்லோருக்கும் ஏற்ற நேரத்தில் ஏற்ற நன்மைகளை எல்லாம் வல்ல இறைவன் அருள் பாலிப்பான்  என்ற நேர்மறையான  நம்பிக்கையோடு இந்த பதிவை நிறைவு செய்கிறேன்.

பின் குறிப்பு:

அருமை நண்பர் விசு அவர்களின் உந்துதலாலும் உங்கள் அத்தனை அன்புள்ளங்களின் அளப்பரிய ஆதராவாலும் இதுகாறும் அவ்வப்போது எழுதி வந்த பதிவுகள் எண்ணிக்கையில் இத்துடன் 200ஐ எட்டிப்பிடித்திருக்கின்றது  என்பதை எண்ணிப்பார்க்கையில் வியப்பு மேலிடுகிறது, விந்தை என் சிந்தையை சிலிர்ப்படைய செய்கிறது.

ஆதரவளித்த - அளித்துகொண்டிருகின்ற அத்தனை அன்புள்ளங்களுக்கும் நன்றிகள்.

மீண்டும் ச(சி)ந்திப்போம்

கோ