உர(ட)ல் மறைந்த மாயம்.

அரிசி குத்தும் அக்கா மகளே!!

நண்பர்களே,

மூச்சுக்கு முப்பத்தெட்டு தடவைகள், நம் கலாச்சாரம், பண்பாடு, நாகரீகம், பாரம்பரியம் என்று சில  விஷயங்களை பேசும் நாம் பல விஷயங்களில் பழமையை விட்டு வெகுதூரம் வந்துவிட்டோம் என்பதை நினைத்து பார்க்க கூட மறந்து போய்விட்டோம்.

தரையில் பாய் போட்டு படுத்தது, கைகளால் உணவை  பிசைந்து சாப்பிட்டது,கம்பு, கேழ்வரகு, திணை , சோளம் பயறு போன்ற தானியங்களை பயிரிட்டது,   கீரை பச்சை  காய்கறிகளை நம் வீட்டு தோட்டங்களிலே வளர்த்து அவற்றை பயன்படுத்தியது, திண்ணைகள் அமைத்து வீடு கட்டியது, மண் பானையில் சமைத்து  உண்டது, இது போன்ற இன்னும் பல பழமையான நல்ல பழக்கங்களையும் முறைமையையும் இப்போது யாரும் நினைத்து பார்க்ககூட விரும்பாதபோது அவற்றை செயல் வடிவில் பின்பற்ற யார் தான் முன் வருவர்.

வசதி, வாய்ப்பு,நேரமின்மை அல்லது நேரம் மிச்சம்,எளிமை, துரிதம், குறைந்த உடல் உழைப்பு, பணம் மிச்சம், தொழில் புரட்சி போன்ற காரணிகளால் மேற்சொன்ன சில பழைமை விடயங்கள் நம்மை விட்டு வெகுதூரம் போய்விட்டன என்று சொல்வதைவிட நாம் அவற்றை விட்டு வெகுதூரம் போய்விட்டோம் என்றுதான் சொல்லவேண்டு.

இந்த காலத்தில் இருக்கும் சிறுவர் சிறுமியரை உரல் , உலக்கை, அம்மி குழவி தெரியுமா என்றால் தெரியாது என்று சொல்வார்கள் , அது சரிதான்.

ஆனால் முப்பது முப்பத்தாறு வயதுள்ளவர்களிடம் கேட்டால் பார்த்திருக்கிறேன் ஆனால்  பயன்படுத்தியது இல்லை, அது எங்கள் வீட்டில் இல்லை என்று சொல்லும்போது இந்த வகை எளிய  வீட்டு  உபயோக உபகரணங்கள் தொலைந்துபோய் எத்தனை ஆண்டுகள் ஆகிவிட்டன என்பது புரிந்துகொள்ள முடிகிறது.

நம் பெரியவர்கள் எதற்காக உரலில் இட்டு உலக்கை கொண்டு கைகுத்தலாக கிடைத்த தானியங்களை பயன்படுத்தினர் என்பதில் பல சூட்ச்சுமங்கள் இருந்திருக்கின்றன என்பதை , அம்மியையும் குழவியையும், உரலையும் , உலக்கையையையும்  கைவிட்டு  நவீன தொழில் நுட்பத்தில் உருவான மிக்சி, கிரைண்டர்களுக்கு தாவியதால், பலமுள்ள   உடல் அமைப்பையும் ஆரோக்கியத்தையும் மீட்டெடுக்க முடியாமல் போவதிலிருந்து நன்றாக புரிந்துகொள்ள முடிகிறது.

இப்போது ஆண்பெண் இருவரும் பெரும்பான்மையான இடங்களில் காலை முதல் மாலைவரை உடல் பயிற்சி கூடங்களில் தங்களை வருத்திக்கொண்டு உடற் பயிற்சி செய்து  தேவை இல்லாமல் தம் உடலில் சேர்ந்துவிட்ட கொழுப்பு, உடல் பருமனை குறைக்க அரும் பாடு படுவதை பார்க்க முடிகிறது.

குனிந்து நிமிர்ந்து வேலைகள் செய்து இயற்கையான முறையில் உடலை பேணும் படியாக அமைந்திருந்த நல்ல பழக்கங்களை பறிகொடுத்துவிட்டு இப்போது பல இன்னல்களுக்கு ஆளாவதை தடுக்கும்பொருட்டு வாரம் ஒருமுறையேனும் மிக்ஸி  கிரைண்டர்களுக்கு விடுமுறை கொடுத்துவிட்டு அம்மியையும் ,குழவியையும்,  உரலையும் ஆட்டுக்கல்லையும் பயன்படுத்தி உணவு பொருட்களை அரைத்து சமைப்பது முடியாத  காரியமா என்ன? 

உரலின் வடிவமைப்பே  அதன் நன்மையை மௌனமாக சொல்லுதே, புரியலையா?

பின்னர் சமைத்த உணவை,  தரையில் பாய்போட்டு சம்மானம் இட்டு அமர்ந்து கைகளால் பிசைந்து உண்ணவும் வாரத்திற்கு ஒருமுறையேனும் தரையில் பாயோ அல்லது துணி விரிப்பையோ போட்டு அதில் படுத்துறங்கும்  ஒரு பழக்கத்தை ஏற்படுத்திகொள்வதும் நம்மால் முடியாத  காரியமா என்ன?

இப்படி தொடர்ந்து செய்வதால் நிச்சயம் நம் உடலிலும் ஆரோக்கியத்திலும் நல்ல முன்னேற்றம் நிகழும் என்பதில் ஐயமில்லை.

பழையன கழிதலும் புதியன புகதலும் தவிர்க்க முடியாதது தான் என்றாலும் மனித குலத்தின் ஆரோக்கியத்திற்கும் , மகிழ்வான வாழ்க்கைக்கும் தேவையான பழமையை கழிக்காமல் சேர்த்து வைத்து புழங்குவதும் போற்றுவதும் மிக அவசியம் என்பதை உணர்ந்து செயல்படுவோம்.

சரிங்க நேரமாகுது இட்டிலிக்கு ஊறவைச்ச  அரிசியும் உளுந்தும் சீக்கிரம் வந்து அரைக்க சொல்லி கண் சிமிட்டுகின்றன.

கிரைண்டர்லதான்   போய் அரைக்கணும்  (இந்த ஊர்ல), அதுக்கப்புறம் நேராக ஜிம்முக்கு போகணும்.

இருப்பவர்கள் உரலையும் அம்மியையும் கழுவி சுத்தம் பண்ணி வைங்க  பயன்படும் பின்னாளில்.

ஏனுங்க புரியுதாங்க? 

வாறேனுங்க. 

நன்றி.

மீண்டும் ச(சி)ந்திப்போம்

கோ