."நம்பிக்கை தளர்ந்த தும்பிக்கைகள்"

தள்ளி விட்டது தள்ளி நின்றது

நண்பர்களே,

சமீபத்தில் எங்கள் கல்லூரி பேராசிரியர் எழுதிய "புள்ளி வச்ச ராஜா" எனும் புத்தகத்தை வாசித்துகொண்டிருக்கையில், பாரதியை குறித்த ஒரு குறிப்பு ஏற்படுத்திய  சிந்தனையின் கலவையே இன்றைய பதிவு.

மனசெல்லாம் மலர் சோலை!!!

குருப்  போட்டோ!!

நண்பர்களே,

நம்மில் எத்தனைபேர்  நமது பள்ளி இறுதியாண்டு அல்லது கல்லூரி இறுதி ஆண்டில் நம்முடன் படித்த மாணவ மாணவியரும், பள்ளி கல்லூரி முதல்வர்கள் நமது ஆசிரியர்கள்  , அலுவலர்கள், பணியாளர்களுடன் சேர்ந்து கடைசியாக எடுத்துக்கொண்ட புகைப்படங்களை பத்திரபடுத்தி வைத்திருக்கின்றோம்?

வாசல் கதவை தட்டினாள் ராச லட்சுமி!!

காசு ... பணம்...துட்டு... மணி ....மணி....

நண்பர்களே,

தமிழ் நாடு, ஆந்திர, கேரளா, கர்நாடகா, நாகாலந்து, மணிபூர் , திரிபுரா,சிக்கிம் என மாநிலங்களின் பெயர்களை வரிசையாக கேட்க்க நேர்ந்தால் நம் எல்லோருக்கும் நினைவுக்கு வரும் பல விஷயங்களுள் முக்கியமான ஒரு விஷயம், லாட்டரி.

போதுமடா சாமி!!

இடி மேல் இடி.....

நண்பர்களே,

உலகில் அவ்வப்போது நிகழும் பல அசம்பாவிதங்கள், பேரிடர்கள், சாலை, ரயில்,கப்பல்,விமான விபத்துகளை குறித்து,  நாம்  அனைவரும் பெரும் துயருக்கு ஆளாகின்றோம்.

ஸ்லிப்பான் சாரி!!!

'மேட் இன் இந்தியா'

நண்பர்களே,  

நம்மில் ஒரு சிலருக்கு ஒருசில விஷயங்கள் பிடிக்காது.  அதேபோல்தான் எனக்கு சாரி கொஞ்சம் கூட பிடிக்காது.

முரண்பாடுகள் !!

குழப்பம்

சனிக்கிழமை காலையிலிருந்தே வானம் கொஞ்சம் மேகமூட்டத்துடன் காணப்பட்டது,  ஆனால் மழை ஏதும் இல்லை.

ஆறு வயது மகன் தோட்டத்தில் விளையாடிகொண்டிருந்தான், சமையல் அறை சன்னல் வழியாக மகனை பார்ததவண்ணம் அம்மா சமையல் செய்ய   காய்கறிகளை நறுக்கிகொண்டிருந்தார்கள்.

அந்த நேரம் சிறுவனின் அப்பா தன் மனைவியிடம், " எனது இந்த மூன்று பேண்டு மூன்று சட்டைகளை துவைத்து விடு திங்கள்கிழமை நான் தேர்தல் வேலைக்காக திண்டுக்கல் போகவேண்டும், மூன்று நாட்கள் அங்கேயே தங்கவேண்டும், அப்படியே, தேவையான, டவல்,பனியன் சோப்பு, பேஸ்ட், பிரஷ் போன்றவற்றையும் எடுத்து  பயண பையில் வைத்துவிடு, நான் சலூன் வரை போய்வருகின்றேன் என கூறிவிட்டு,  தோட்டத்தில் விளையாடிகொண்டிருந்த மகனுக்கு டாட்டா சொல்லிவிட்டு வெளியில் சென்றுவிட்டார்.

மனைவியும் சமையல் வேலைகளை பாதியிலேயே  விட்டுவிட்டு  கணவன் கொடுத்துவிட்ட போன துணிகளை துவைத்து  தோட்டத்தில் காயபோட்டாள்.

பிறகு காற்று பலமாக வீசுவதால் தோட்டத்தில் இருந்த தன் மகனை வீட்டுக்குள் அழைத்துவந்து காற்றில் ஆடிய கதவுகளை அடைத்து மூடினாள். 

இதற்கிடையில் சலூனில் கூட்டம் நிரம்பி இருந்ததால் எதிர்பார்த்த நேரத்தைவிட கூடுதலாக சலூனில் காத்திருக்க வேண்டியதாயிருந்தது கணவருக்கு.

தனது முறை வந்தது, கணவன் அந்த சலூனின் சுழல் நாற்காலியில் அமர்ந்தார் " கட்டின் அண்ட் ஷேவிங்"

முடிவெட்ட ஆரம்பித்த சிறிது நேரத்தில் மடியின் கணம் தாங்காமல் மேக மூட்டை உடைந்து பெய்தது பேய்மழை.

பின்னர் ஷேவிங்.

 எல்லாம் முடிந்தும் கடையை விட்டு வெளிவர மழை அனுமதிக்கவில்லை.

வர நேரமாகும் என மனைவியிடம் சொல்ல தனது பேன்ட் பாக்கட்டில் மொபைல் எடுக்க கைவிட்டு துழாவினார், அப்போதுதான் நினைவுக்கு வந்தது, மொபைலை சார்ஜிங்ல் போட்டுட்டு வந்தது.

சரி மழை விடும்வரை இங்கேயே இருந்துவிட்டு போகலாம் என்று நினைத்து சலூனில் இருந்த ஒரு பத்திரிகையில் இருந்த செய்திகளை வாசித்துகொண்டிருக்க மழை கொஞ்சம் விட்டிருந்தது.

வீட்டிற்கு வந்த கணவன் மனைவியிடம் , பாத்ரூமில் சோப்பும் டவலும் எடுத்து வைக்கும்படி கூறினார். மனைவியும் எடுத்துவைத்துவிட்டு வந்தாள்.

குளித்து முடித்து வெளியில் வந்த கணவன், துணி துவைத்துவிட்டாயா என கேட்க்க  அப்போதுதான் நினைவுக்கு வந்தது மொட்டை மாடியில்  காயவைத்த துணிகளை  மழை வந்தபோது எடுக்க மறந்துபோன விஷயம்.

கணவனின் கேள்விக்கு பதில் சொல்லகூட நிற்காமல் அரக்க பறக்க தோட்டத்தில் சென்று நனைந்திருந்த துணிகளை தண்ணீர் சொட்ட சொட்ட  கொண்டுவந்ததை பார்த்த கணவனுக்கு கடுமையான கோபம் வந்தது.

மனைவியை கோபத்துடன் திட்டி துணிகளை ( பிடுங்கி) நன்றாக பிழிந்து  வீட்டின் உள்ளேயே தமது ட்ரெட்மில் (இப்போது பெரும்பான்மையான வீடுகளில் ட்ரெட்மில்கள் துணிகாயவைக்கத்தான் பயன்படுகின்றதாம்) மேல் பரப்பி காயவைத்துவிட்டு மீண்டும் மனைவியின் கவனக்குறைவை திட்டிக்கொண்டிருந்தார்.

திட்டு வாங்கிய மனைவி தனது கவனக்குறைவை நினைத்து வருத்தம் தெரிவித்துவிட்டு, விடுபட்ட சமையல் வேலையி ல் மும்முரமானாள்.

இத்தனையையும் பார்த்துகொண்டிருந்த அந்த சிறுவன் அம்மாவிடம் ஏன் உங்களை அப்பா திட்டுகிறார் என புரியாமல் கேட்க்க, அப்பாவின் துணிகள் மழை வரும்போது எடுக்காமல் விட்டுவிட்டேன் -  மழையில் நனைந்து விட்டது அதற்காகத்தான் அப்பா திட்டுகின்றார்.

ஆமாம் நீங்கள் தானே அதை முதலில் தண்ணீரில் நனைத்தீர்கள் பின்னர் மழையில் நனைந்துவிட்டது என சொல்கின்றீர்களே?

மகனுக்கு எப்படி புரியவைப்பது?

சொல்லுங்கம்மா....நீங்கள்தானே தண்ணீரில் நனைத்தீர்கள்?

அதாவது .. துணியில் உள்ள அழுக்குகளை சுத்தம் செய்ய தண்ணீரில் நனைத்து சோப்புபோட்டு , பிரஷ்கொண்டு தேய்த்து பின்னர் அன்றாக அலசி வெய்யிலில் காயவைக்கவேண்டும் அப்படி காய்ந்த துணிகளை தான் உடுத்தவேண்டும்.

மகனுக்கு ஏதும் புரியவில்லை.

அடுத்தநாள் ஞாயிற்றுக்கிழமை.

காலையில் சுமார் பதினோரு மணி இருக்கும்.

அப்பா தனது அறையில் நேற்று துவைத்து காயவைத்த தமது துணிகளை இஸ்திரி போட்டுகொண்டிருந்ததை  சிறுவன் எட்டிப்பார்த்தான்.

பார்த்த சிறுவனுக்கு , நேற்று அம்மா சொன்ன விளக்கமே இன்னும் புரியாத நிலைமையில் இன்று அப்பா செய்வது மேலும் குழப்பத்தை உண்டுபண்ணியது.

அப்படி அவனது அப்பா என்னதான் செய்துகொண்டிருந்தார்?

நேற்று துணிகள் மழையில் நனைந்துவிட்டதற்காக அம்மாவை திட்டிய அப்பா இன்று அந்த  துணிகளை இஸ்திரி செய்யும் போது அவற்றின் மீது தண்ணீர் தெளித்து ...தண்ணீர் தெளித்து... இஸ்திரி செய்துகொண்டிருந்தார்.

என்ன இது துணிகளை அம்மாவே தண்ணீரில் நனைத்தார்கள் பின்னர் மழையில் நனைத்துவிட்டதாக அப்பா கோபப்பட்டார், இன்று அப்பவே ஏன் நீரில் நனைத்து இஸ்திரி செய்கின்றாரே?

என்ன நடக்கிறது என புரியாமல் இதைக்குறித்து அப்பா அம்மா இருவரிடமும் கேட்டு, அவர்கள் சொல்லும் விளக்கமும் தமக்கு கண்டிப்பாக புரியாது என்று எண்ணி இந்த குழப்பத்தை தனக்குள்ளாகவே புதைத்துக்கொண்டான்.

இந்த முரண்பாட்டால் சிறுவனுக்கு ஏற்பட்ட  குழப்பம் ஞாயமானதுதான் , ஆனால் செய்திதாளில் வந்த ஒரு செய்தியை நண்பரொருவர் என்னிடம் சொன்னது எனக்கு முற்றிலும் வேடிக்கையாக இருந்தது.

அதாவது "வட" நாட்டில் ஏதோ ஒரு அரசியல் தலைவர் ஊழல் வழக்கில் தண்டனை பெற்று சிறையில் இருந்தாராம்.

அவரை ஜாமீனில் வெளிக்கொண்டுவர அவரது கட்சி தொண்டர்கள் எவ்வளவோ  முயன்றும் ஜாமீன் கிடைக்காததால்,கடைசியாக தமது தலைவருக்கு இருக்கும் வியாதியை காரணம் காட்டி, அவருக்கு சிறையில் இருந்தால் தகுந்த சிகிச்சை அளிப்பது சிரமம், எனவே அவரை அவரின் வியாதியின் வீரியத்தை கருத்தில்கொண்டு ஜாமீன் வழங்கும்படி செய்த விண்ணப்பத்தை பரிசீலித்த நீதிபதிகள், அவர்கள் சொன்ன காரணத்தை, மருத்துவ அறிக்கையின்   அடிப்படையில், ஏற்று ஜாமீன் கொடுத்தார்களாம்.

தமது தலைவர் வெளிவந்த மகிழ்ச்சியில் மிதந்த தொண்டர்கள் அந்த மகிழ்ச்சியை மற்றவர்களோடு  சேர்ந்து  ஊரில் உள்ள அனைவருக்கும் "இனிப்புகள்" கொடுத்து கொண்டாடினார்களாம்.  

ஆமாம் இதில் என்ன முரண்பாடு இருக்கின்றது?

இனிப்புகள் கொடுத்து கொண்டாடி  மகிழும் அந்த தொண்டர்களின்  அன்பு தலைவருக்கு  ஜாமீன் கிடைக்க காரணமாயிருந்த வியாதி "சர்க்கரை நோயாம்".

மேல் இடத்து அரசியல் வியா(வா)தி சமாச்சாரம் எல்லாம் நமக்கு எதற்குங்க?

நாம துணியை நனைத்து காய வைத்து பின்னர் தண்ணீரில் நனைத்து இஸ்திரி போடறத மட்டும் பார்த்தா போதும்ங்க என நண்பரிடம் சொல்லிவிட்டேன். 

 என்ன நான் சொல்றது சரிதானே?

நன்றி. 

மீண்டும் ச(சி)ந்திப்போம்.

கோ

பனையின் மழலை!!

"பேபி பாம் ட்ரீ - கிலோ £3.00"

நண்பர்களே,

வழக்கமாக நங்கள் குடியிருக்கும் பகுதியில் நம் இந்திய காய்கறிகள் ஒரு சில ஆசிய மளிகை மற்றும் காய்கறிகள் விற்பனை செய்யும் கடைகளில் வியாழன் மற்றும்  வெள்ளிக்கிழமைகளில்தான் புதிதாக - பிரஷ்ஷாக  கிடைக்கும்.

எனவே நேற்று  மாலை அலுவலகம் விட்டு வரும் வழியில் இருந்த ஒரு இலங்கை  தமிழரின் மளிகை கடைக்கு சென்று, ஏதேனும் நமக்கு பிடித்த காய்கறிகள் புதிதாக வந்திருக்கின்றதா  என பார்க்க போனேன்.

அங்கே பலதரப்பட்ட மர கறிகள்  புதிய பொலிவுடன் அடுக்கி வைக்க பட்டிருந்தன.

கண்களுக்கு மிகவும் குளிர்ச்சியாக இருந்தது.

இங்கே சாதாரணமாக நம் தமிழ் நாட்டில் என்னென்ன காய்கறிகள் உள்ளனவோ அவை அத்தனையும்  இங்கே கிடைக்கும், கறிவேப்பிலை வரை.(ஒரு பத்து அல்லது பனிரெண்டு கீற்றுகள்(கீற்றுகள் சரியா??) 100 ரூபாய். மற்றவற்றின் விலையை நீங்களே யூகித்துக்கொள்ளுங்கள். 

வெண்டைக்காய் எனது பேவரிட், ஆனால் புதியதாக இல்லை, சரி நாளை வந்து வாங்கிக்கொள்ளலாம்  என நினைத்துகொண்டு அப்படியே மற்ற எல்லா காய்கறிகளையும் நோட்டமிட்ட என் கண்களில் அபூர்வமாக பட்டது "பனங்கிழங்கு".

ஆகா... எத்தனையோ ஆண்டுகளுக்கு முன் பார்த்தது.

ஆரம்ப பள்ளிகூட நாட்களில் பள்ளியின் முகப்பில் பாட்டியின் கடையில்  தரையில் விரிக்கப்பட்ட கோணி பையின்மேல் பரப்பப்பட்ட  எலந்தம்பழம், நாகப்பழம், எலி மிட்டாய், கமர்கட்டு,புளிப்புமிட்டாய் அவற்றின்  மத்தியில் கூறு கட்டப்பட்ட  வேகவைத்த- வறுத்த  வேர்கடலை , கரும்பு ,வேகவைத்த  பனங்கிழங்கை பார்த்த ஞாபகம். 

வெளியில் விற்கும் இது போன்ற எந்த பொருளையும் வாங்கி சாப்பிடகூடாது என்ற "தாய் சொல்லை"யும் தட்ட வைத்து நண்பன் ராஜ் குமாரோடு சேர்ந்து வாங்கி அதை எப்படி சாப்பிடுவது என்றுகூட தெரியாமல் , கரும்பை மெல்லுவதுபோல் மென்று வாயெல்லாம், பல்லெல்லாம் அதன் நாரு  மாட்டி அதை அப்படியே நாரோடு மென்று தின்று பின்னர் அம்மாவிடம் அடி வாங்கியநினைவுகளும், பின்னர் அம்மாவே மார்கெட் போய் வாங்கிவந்து வீட்டில் வேகவைத்து நாரு களைந்து சின்ன சின்னதாக உடைத்து சாப்பிட பழக்கி கொடுத்ததையும், இன்று இந்த கடையில் பார்த்த பனங்கிழங்கு என் மன கிடங்கிலிருந்த ஞாபக துகள்களை  எனக்கு நினைவு படுத்தியது.  

"சரி இந்த பனங்கிழங்கு என்னவிலை?"

"கிலோ 300 ரூபாய்."(£3.00)

"ஒரு கிலோவிற்கு எத்தனை வரும்?"

 "சுமார் பனிரெண்டு கிழங்குகள் வரும்" 

"இது எங்கிருந்து வந்தது?"

"இலங்கையில் இருந்து".

"சரி எனக்கு இரண்டு போதும் .. கொடுங்கள்."

கடைகாரர் எடைபோட்டு கொடுத்தார் அதில் இரண்டுமே  அடிபாகம் மிகவும் தடித்த கிழங்குகள் அவைதான் ருசியாக இருக்கும் என்று கடை காரர் சொல்லிகொண்டிருந்தார்.

அந்த நேரம் பார்த்து ஒரு ஆங்கிலேயரும் அவரது மனைவியும் நான் இருந்த கடைக்குள் வந்து கடைகாரரிடம், பம்கின் (பூசணிக்காய் சூப்பு செய்வார்கள்)   வேண்டும் என கேட்க்க கடைகாரர் பூசணிக்காய்  அடுக்கி வைக்கபட்டிருந்த பகுதியை காட்ட அவர் என்னை தாண்டிப்போக நேர்ந்தது.

அப்போது என் கையில் இருந்த பனங்கிழங்கை காட்டி கடைகாரரிடம் இது என்ன வெஜிடபள் என கேட்டார்.

அதற்க்கு கடைகாரர் அது வந்து .... அது வந்து.... என அதன்  ஆங்கில பெயர் தெரியாமல் , என்னை பார்த்து சார் இது என்னன்னு கொஞ்சம் ஆங்கிலத்தில இவருக்கு சொல்லுங்க என்றார்.

 எப்போ இந்த கடைகாரரிடம் நான் ஷேக்ஸ்பியரின் பேரன் என்று சொன்னேன், இப்போ திடீர்னு பனங்கிழங்குக்கு ஆங்கில பெயர கேட்டா நான் என்னத்த சொல்றது?

"ஹாய் , திஸ் இஸ் பேபி பாம் ட்ரீ" .

"பேபி பாம் ட்ரீ"??

"எஸ் ....சேம்   லைக் பேபி கார்ன் ,பேபி ஸ்பினச்,பேபி டர்னிப், பேபி பொட்டேட்டோ..".

"ஒ ..... இன்ட்ரஸ்டிங்..இஸ் திஸ் எடிபில்?"

"யா.....அப்கோர்ஸ் .... குட் பார் ஹெல்த்."

"இஸ் இட் ?"

"திஸ் இஸ் புல்லி லோடட்  வித் ஆல் மினரல்ஸ் அண்ட் விட்டமின்ஸ்...."(என்னென்ன மினரல் விட்டமின்னு கேட்டா மாட்டிக்குவோம்)

"ஹவ்  டு குக் திஸ்?""

நானே இன்னிக்குதான் ட்ரை பன்னபோறேன் இதுல உனக்கு வேற டூஷன் எடுக்கணுமா என நினைத்துக்கொண்டே, 

ஐ தின்க் தி ஷாப் கீபர் கேன் எக்ஸ்ப்ளைன் பெட்டர்"

என்று சொல்லிவிட்டு நான் வாங்கிய பனங்கிழங்குக்கான பணத்தை கொடுத்துவிட்டு கடையை விட்டு நடையை கட்டினேன்.

வீட்டுக்கு வந்து ஒரு வழியாக பிரஷர் குக்கரில் வைத்து வேகவைத்து, நண்பன் ராஜ்குமாரை நினைத்துக்கொண்டே ஒரு முழு கிழங்கையும் சாப்பிட்டு முடித்தேன் அடுத்தது நாளைக்கு.

இன்றுமாலை மீண்டும் அதே கடைக்கு வெண்டைக்காய்  வாங்க போனேன்.

உள்ளே நுழைந்ததும்   என் கண்ணில் பட்டது அழகாக வண்ண எழுத்துக்களால் எழுதப்பட்ட ஒரு சிறிய பெயர் பலகை.

அந்த பலகை பனங்கிழங்கு அடுக்கி வைக்க பட்டிருந்த செல்ப் அருகில் வைக்கபட்டிருந்தது.

அப்படி  என்ன எழுதபட்டிருந்தது அந்த பலகையில்?

"பேபி பாம் ட்ரீ - கிலோ £3.00" (edible)

நன்றி.

மீண்டும் ச(சி)ந்திப்போம்

கோ