இனம்புரியா இன்ப வெள்ளம்!

உள்ளமெல்லாம் !!

 நண்பர்களே,

காரணம் இல்லாமல் காரியம் இல்லை என்பது ஒரு பொதுவான கூற்று.

அதே சமயத்தில்,  புரியாத மகிழ்ச்சி, இனம் புரியாத துக்கம், இனம்புரியாத கலக்கம் என்று சொல்வதையும் கேட்டிருப்போம் அல்லது உணர்ந்திருப்போம்.

நமக்கு உண்டாகும் உணர்வுகள் அத்தனைக்கும் எதோ ஒரு காரணம் இருக்கும் என்பது பொதுவான தீர்மானம்.

ஆனால்  சிலவேளைகளில், எந்த ரணமும் இன்றி மனம் சோர்வாக கலக்கமாக சில வேளைகளில் பயமாக கூட இருக்கும், ஏனென்று தெரியாது.

அதே போல் மனம் என்னவென்றே தெரியாமல் சில வேளைகளில் மகிழ்ச்சியாகவும் பரவசமாகவும்  இருக்கும் , காரணத்தை ஆற அமர்ந்து யோசித்தாலும் பிடிபடாது.

இதைத்தான்  ஒருவேளை இனம்புரியாத மகிழ்ச்சி அல்லது இனம்புரியாத துக்கம் , கலக்கம் என்று சொல்கிறோமோ?

காலையில் விவரமாக நினைவிற்கு வராமல் போகும்   நேற்றிரவு நாம் கண்ட கனவுகள்கூட இதுபோன்ற உணர்வுகளுக்கு காரணமாக அமைவதுண்டு.

அவ்வகையில், இன்று எனக்கும் ஒரு இனம்புரியாத உணர்வு ஏற்பட்டது. அதை சொல்லில் வடிக்க முடியாது.

என்ன உணர்வு, நேர்மறையான உணர்வா அல்லது எதிர்மறையான உணர்வா?

மனம் முழுவதும் ஆக்கரமித்து மீண்டும் மீண்டும் நினைவில் தோன்றி நிரம்பி ததும்பும் அந்த உணர்வு மகிழ்ச்சியான உணர்வுதான்.

இதுபோன்று  மனம் மகிழும் உணர்விற்கு என்ன காரணம் என்று சற்று யோசித்துப்பார்த்தேன், ஒரு காரணமும் புலப்படவில்லை, பிடிபடவில்லை, நேற்றைய இரவு கண்ட(?? !!)கனவுகூட முழுமையாக நினைவிற்கு வரவில்லை.

காரணத்தை யோசித்துக்கொண்டு காலத்தை விரயமாக்குவதை தவிர்த்து, நமக்கு  எப்போதாவது ஒருமுறைதான் இதுபோன்ற  மகிழ்ச்சி தருணங்கள் மனதில்  தோன்றி  அந்த நாளை சிறப்பு நாளாக அமைத்துக்கொடுக்கும்;  அதை ஆராய்ந்துகொண்டிருப்பதிவிட அந்த தருணத்தை முழுமையாக  அ  னுபவிப்பதுதான் சால  சிறந்தது என்றெண்ணி இதோ இந்த நிமிடம் வரை மகிழ்ந்திருக்கிறேன்.

யார் அல்லது எது காரணம்?

இந்த பிரபஞ்சத்தில் நம்மை படைத்து நம்மை ஆட்டுவித்து துக்கத்தையும் மகிழ்ச்சியையும் மாற்றி மாற்றி கொடுத்து நம்மை இயக்கிக்கொண்டிருக்கும்  எல்லாம் வல்ல பரம்பொருள் அந்த பரமேஸ்வரனான  மகேஸ்வரனுக்கே வெளிச்சம்.

இதுபோன்று உங்களுக்கும் இனம்புரியாத உணர்வுகள் ஏற்பட்டிருப்பின், மறக்காமல் பகிரவும்.

நன்றி. 

மீண்டும் ச(சி)ந்திப்போம்.

கோ.